પૂછવું કઈ રીતથી ?

શબ્દ નૈ, સંકેત નૈ, જે પૂછવું તે પૂછવું કઈ રીતથી?
આંસુ જે ક્યારેય પણ આવ્યું જ નૈ તે લૂછવું કઈ રીતથી?

તું પ્રથમ અમને હવામાં નામ લખવાનું કહે એ શક્ય છે?
ને ઉપરથી ઘૂટવાનું પણ કહે તો ઘૂંટવું કઈ રીતથી?

તું કહે છે સાવ ભૂલી જા મને ને હું ય કોશિશ તો કરું,
પણ જળ વડે પત્થર ઉપરનું કોતરેલું ભૂંસવું કઈ રીતથી?

હું હવે સંપૂર્ણ તારો થઇ ગયો છું, હું હવેથી હું નથી,
પ્રશ્ન એ છે કે મને મારી કનેથી જૂંટવું કઈ રીતથી?

અનિલ ચાવડા