‘મને ખોટું નથી લાગ્યું’ કહું છું, પણ લગાડું છું!
ઘણી વેળા હું પોતાને જ આ રીતે દઝાડું છું!
હું એકલતા આ મારી જોરથી એવી પછાડું છું!
મને જોનારને લાગે કે હું પોતે જ ધાડું છું!
અરે ભૈ હું જ છું સામાન મારો, હું જ ગાડું છું,
કહો ઉઘરાણીવાળાને કે હું પોતે જ ભાડું છું!
બધા કહે છે તમારે તો હવે જલસા જ જલસા છે
તમે સૌ મારી હિંમત તો જુઓ હું હાય પાડું છું!
ઘણી વેળા તો મારામાં પડેલા સૌ અભાવોને;
હું ‘ઊંઘી જાવ ઊંઘી જાવ‘ બોલીને ઊઠાડું છું!
મને લાગે છે કે મારી બધી મીઠાશ એળે ગઈ,
ગળા સુધી ધરાયેલાની થાળીનો હું લાડું છું!
સમય-સંજોગ-કિસ્મતના જ સૌ રંગો વખોડું ને!
કયા મોઢે કહું કે ચિત્ર હું જાતે બગાડું છું!
કયામતના જમાદારો તમે ડંડો પછાડો નહિ!
હું આત્માનાં બધાં પડ તો ઉખાડીને બતાડું છું!
~ અનિલ ચાવડા
