કૈં અધૂરી વાત અંતે રહી જવાની હોય છે,
શક્યતાઓ સાત અંતે રહી જવાની હોય છે.
એક પંખેરું ઊડી જાશે અકળ આકાશમાં,
માટીની આ જાત અંતે રહી જવાની હોય છે.
જિંદગી ભરચક દિવસની જેમ જીવી જાવ પણ,
એક અટૂલી રાત અંતે રહી જવાની હોય છે.
રોજ અહીં કંઈ કેટલું આટોપવા મથ્યા કરો!
સામટી શરૂઆત અંતે રહી જવાની હોય છે.
કેટલા સાવધ રહો કે ભાગતા-બચતા ફરો,
એક-બે તો ઘાત અંતે રહી જવાની હોય છે.
અન્ય કાજે જેટલું જીવી શકો, જીવી જુઓ!
એ જ નોખી ભાત અંતે રહી જવાની હોય છે.
છોડ! દુનિયા છે, ઘણું કહેશે – ઘણું વિચારશે,
એ બધી પંચાત અંતે રહી જવાની હોય છે.
– હિમલ પંડ્યા
Continue Reading
