બધીયે વાતમાં બસ એટલે ફાવ્યા કરું છું હું

બધીયે વાતમાં બસ એટલે ફાવ્યા કરું છું હું,
બરાબર લક્ષ્ય સાધીને પછી વીંધ્યા કરું છું હું.

પ્રથમ તો સાવ મોઢે રોકડું પરખાવી દઉં છું, પણ-
અસર થાતી નથી, ત્યાં હોઠને સીવ્યા કરું છું હું.

કવચ-કુંડળ ઊતારી ક્યારના સોંપી દીધા તમને,
ખુમારી છે હજુ અકબંધ, તો લડ્યા કરું છું હું.

રખે ને તારી સાથેનાં એ સ્મરણો નીકળી આવે,
જખમને એ રીતે, બસ એ રીતે તાક્યા કરું છું હું.

અધૂરી હોય ઈચ્છા ત્યાં સુધી ક્યાં દેહ છૂટે છે?
તને ઝંખ્યા કરું છું એટલે જીવ્યા કરું છું હું.

~ હિમલ પંડ્યા