જીવવું છે? મરતાં શીખવું પડશે…

મૃગજળમાં તરતાં શીખવું પડશે
જીવવું છે? મરતાં શીખવું પડશે

હવે સત્યનો માપદંડ છે સફળતા
નિષ્ફળોથી પલટતાં શીખવું પડશે

કળિયુગે બદલાઈ છે વ્યાખ્યા સૌ
જીતવું છે? હારતાં શીખવું પડશે

નહીં તો એ બદલી દેશે ખોટું બધુંય
પારસમણિને નડતાં શીખવું પડશે

ગુસ્સો,પીડા ઉતારવા કોઈ જોઈશે
રોજ બચ્ચાંને વઢતાં શીખવું પડશે

નાદારી,ચમચાગીરીનો સમય છે આ
વફાદારીને ભૂલતાં શીખવું પડશે

અવાજને એનાં લગાવો સાઇલેન્સર
આત્માને મારતાં શીખવું પડશે

ટોચ પર હોય જગ્યા ફક્ત એક જ
હરીફો,નિયમોને છેતરતાં શીખવું પડશે

સામ,દામ,દંડ,ભેદ એ જ જીતમંત્ર
મૂલ્યોને વિસરતાં શીખવું પડશે

– મિત્તલ ખેતાણી