જૂનું તો થયું રે દેવળ – મીરાંબાઈ

જૂનું તો થયું રે દેવળ જૂનું તો થયું
મારો હંસલો નાનો ને દેવળ જૂનું તો થયું

આરે કાયા રે હંસા, ડોલવાને લાગી રે
પડી ગયાં દાંત, માંયલી રેખું તો રહ્યું
મારો હંસલો ને દેવળ જૂનું તો થયું

તારે ને મારે હંસા પ્રીત્યું બંધાણી રે
ઊડી ગયો હંસ પીંજર પડી તો રહ્યું
મારો હંસલો ને દેવળ જૂનું તો થયું

બાઈ મીરાં કહે પ્રભુ ગિરિધરનાં ગુણ
પ્રેમનો પ્યાલો તમને પાઉં ને પીઉં
મારો હંસલો ને દેવળ જૂનું તો થયું

– મીરાંબાઈ