બાકી રહી ન ઝંખના, તારા અભાવમાં
બસ એટલો ફરક પડ્યો મારા સ્વભાવમાં.
ડૂબાડીને મને, રહે શાને તણાવમાં ?
મેં ક્યાં કહ્યું’તું કે મને બેસાડ નાવમાં !
પાણીએ એને એવું તે શું કહી દીધું હશે?
આ માછલી કાં તડફડે આજે તળાવમાં ?
એવી સ્થિતિ ન દેજે મને કોઈ દી’ ખુદા
એનાથી દૂર થાઉં હું બેહદ લગાવમાં .
મારા જીવનમાં એમ છે જોડાણ આપનું
પીડાનું સ્થાન જેમ કોઈ તાજા ઘાવમાં.
મંઝિલ નહીં મળ્યાનો કોઈ રંજ ક્યાં રહ્યો ?
ઇચ્છ્યું હતું એ પામી લીધું મેં પડાવમાં !
પોતીકું તેજ લઇને સતત ઝળહળ્યા કરો ,
સામે ભલે હો સૂર્ય, ન આવો પ્રભાવમાં .
શબનમ
