ઓ હૃદય તેં પણ ભલા કેવો ફસાવ્યો છે મને

ઓ હૃદય તેં પણ ભલા કેવો ફસાવ્યો છે મને ,
જે નથી મારાં બન્યાં એનો બનાવ્યો છે મને

સાથ આપો કે ન આપો એ ખુશી છે આપની,
આપનો ઉપકાર મારગ તો બતાવ્યો છે મને

મારા દુઃખના કાળમાં એને કરું છું યાદ હું,
મારા સુખના કાળમાં જેણે હસાવ્યો છે મને

હોત દરિયો તો હું તરવાની ય તક પામી શકત,
શું કરું કે ઝાંઝવાંઓએ ડુબાવ્યો છે મને

કાંઈ નહોતું એ છતાં સૌએ મને લૂંટી ગયાં,
કાંઈ નહોતું એટલે મેં પણ લુંટાવ્યો છે મને

આમ તો હાલત અમારા બેયની સરખી જ છે,
મેં ગુમાવ્યાં એમ એણે પણ ગુમાવ્યો છે મને

એ બધાંના નામ લઈ મારે નથી થાવું ખરાબ,
સારા સારા માનવીઓએ ફસાવ્યો છે મને

આ બધાં બેફામ જે આજે રડે છે મોત પર,
એ બધાંએ જિંદગી આખી રડાવ્યો છે મને

બરકત વિરાણી ‘બેફામ’