કૃષ્ણ જેવા કૃષ્ણ ત્યારે યુદ્ધ ના રોકી શક્યાં

શબ્દ જ્યારે આપણે જોખીને ના બોલી શક્યાં.
કૃષ્ણ જેવા કૃષ્ણ ત્યારે યુદ્ધ ના રોકી શક્યાં.

પી લીધા છે ઝાંઝવા સહુએ તરસના નામ પર,
ગાળીને ખુદમાં જ વિરડો,પાણી ના શોધી શક્યાં

આપણે સહુ ફૂલના વેપારી જેવા છીએ બસ,
ફૂલો તોલ્યા, તે છતાં ખુશ્બૂને ના તોળી શક્યાં.

હાથ જોડવે સમય ત્યારે જ જોડીએ છીએ,
પ્રેમથી તો હાથ ક્યારે આપણે જોડી શક્યાં?

એક પળમાં મોત આવી છોડી નાખે છે ગાંઠો બધી,
આપણે ક્યાં ગાંઠ એકાદી કદી છોડી શક્યાં ?

– જયેશ ભટ્ટ