ગળથૂથીથી ગંગાજળની વચ્ચે કેવાં અટવાયાં?
ધખતા રણમાંહે મૃગજળની વચ્ચે કેવાં અટવાયાં?
જીવતરના અંધારામાં વરસોથી ફાંફા માર્યા છે;
સપનાં, શ્રધ્ધા ને અટકળની વચ્ચે કેવાં અટવાયાં?
સુખ પામ્યાં, દુ:ખ પામ્યાં, આંસુ પણ આવ્યાં ને હસ્યાં પણ!
આ પળ, પેલી પળ, હર પળની વચ્ચે કેવાં અટવાયાં?
દુનિયાએ જકડેલાં, કયારેક જાતે પણ જકડાયા’તા;
બેડી, સળિયા ને સાંકળની વચ્ચે કેવાં અટવાયાં?
સાવ સિફતથી નીકળી જાશું એવું કંઈ વિચાર્યુ’તું;
પાપ-પુણ્ય અને અંજળની વચ્ચે કેવાં અટવાયાં?
લખવા બેઠાં થોડું સંબંધો વિશે, સ્મરણો વિશે;
લખવા બેઠાં તો કાગળની વચ્ચે કેવાં અટવાયા?
~ હિમલ પંડ્યા
