ફૂલો પાસે હતા ફોટા અમારા

ફૂલો પાસે હતા ફોટા અમારા
ભ્રમર પૂછે છે સરનામા અમારા

તમારા છાંયડા, તડકા અમારા.
તમે ઓઢો, જો પડછાયા અમારા.

તમારા મૌનનાં અંધારા ખૂણે;
લ્યો ગઝલોનાં દીવા મૂક્યા અમારા

પૂછી લ્યો કેમ છો એ પૂરતુ છે.
અભરખા પણ ઉમરવાળા અમારા.

ભલે શણગારો તમને પણ, એ જોવા,
તમારા ખંડમાં તકતા અમારા.

નવું કરીએ કશું દરરોજ કરતાં,
તમારું વહાલ ને છણકા અમારા.

તમે તો છાપ બન્ને માંગી, ને તોય,
અમે સિક્કા ઉછાળ્યા’તા અમારા.

તમે મ્હેંદી મૂકાવી એ ઘડીથી,
બધાં જ્યોતિષ પડ્યા ખોટા અમારા.

– ગૌરાંગ ઠાકર