માવલડીના પાલવ ગ્યા ને ગઈ દાદા ની વાતો…

માવલડીના પાલવ ગ્યા ને ગઈ દાદા ની વાતો,
ઘી ગોળના ચૂરમાં ગ્યા,ગઈ સંતાકૂકડી ગાતી.

ગિલ્લી ડંડા ભમરડા ગ્યા ગઈ બળદ ગાડા ની વાત્યુ,
રાસ,રાહડા ગરબી ગઈ,ગઈ ચંદરવાની ભાત્યું,

ગોરી કેરું ગવન ગયુ, ગઈ પનઘટની પનિહારી,
તાંબા પિત્તળ હેલ ગઈને, ગઈ ઝરૂખા બારી,

ગાય ભાંભરડા ઘમ્મર વલોણા ગયા રાગ પ્રભાતી,
ધૂપ,દિપ ને ઝાલર ટાણું નોબત આરતી થાતી,

ગઈ ડેલીઓ ગયા ડાયરા ગઈ મેમાનુની મોજું,
લાપસી,લાડુ,શિરામણ ગ્યા, કયાં ગઈ અરજુ-ચરજુ,

માંચી, ઢોલીયા, ઘરરર ઘંટી,માફો વેલ્ય મશીયાળા,
ખાંડણીયો ને સાંબેલું ગ્યુ ઘર થયા ઓશિયાળા,

મેઘ ગાણાં અને પરબલાં ,ગઈ મણ દેવતાની વાત્યુ,
મોતી તોરણ મશાલું ગઈ,ગઈ ઘરચોળાની ભાત્યું,

આંણુ, ટાંણુ, ઝિયાણુ ગ્યુ, ગ્યુ ભાંણુ તરભાણુ,
ગાગર,ઉતરડ,આઝમેણ ગ્યા,ગ્યુ બલોયા ને બોઘાણુ,

નાડ, જોતરને ભંડકિયું ગ્યુ,ગયો મોળીયો,માંચી,
ગયો સલૂખો ગયો વાનોરો ગયા તેલને ઘાંચી,

લાંગ,પટારો ડામચીયો ગ્યો, ગઈ કેડી ને બેડી,
સુંડલા,સુપડા,ડાલાં, ફાનસ ગ્યુ પીઠ,પલાણ ને ઘોડી,

ગમાણ, સાંકળ,ખીલા,ઓગઠ જોગણ ને જાદરીયુ,
ઠોઠા, બાફલુ,નીરણ, નોધણુ ગયુ ભેંસ માદરિયું,

માઢ,મેળી,ગોખ,ઓટલો,ખોંભી,ખૂંટ ને ખારું,
મોભ,મોતીયા,ઘોડિયાવટને ખેતર ખોળીબારું,

ખળા, હાલરૂ, શેંકલા,મોગો,ઝાલ, ઉંટડો,થાળુ,
માણ,મોરીયો નાથ ગઈને ગયુ માચડો,માણું,

જેર,જોટો,આગળીયો ગ્યો, ભૂંગળ ને વળી તાળુ,
તાપણ સગડી કુલડી ગ્યાને, બારસાખ પાણિયારું,

બાળાપણને જુવાની ગઈ,ગ્યુ ઘડપણ ગોઝારું,
“શંકર” કે તું સમર હરિને,પાછો વળ તો સારું.