ચોમાસુ વરસી એવું ગયું કે વ્યોમે વાદળ વેચી નાખ્યા,
પશ્ચિમથી એક વાયરો વાયો કે નિજ સંસ્કારો વેચી નાખ્યા.
દિલમાં શોધ્યાને ના મળ્યા તો પથ્થરમાં પ્રભુ વેચી નાખ્યા,
સંપત્તિના સરતાજ થવું છે જાતને જગમાં વેચી નાખ્યા.
ધ્રૂસકે ધ્રૂસકે દીકરી વળાવી બાપે અશ્રુ વેચી નાખ્યા,
“બા“નું તેરમું પત્યું નથી કે છીંકણી ડાબલા વેચી નાખ્યા.
ઈચ્છાઓ બધી પૂરી થઈ ને ખરતા તારા વેચી નાખ્યા,
ગમતા ચહેરાની ના સાંભળી મ્લાન ગુલાબો વેચી નાખ્યા.
ઘાવની શુ વાત કરો, જખમી સિસકારા વેચી નાખ્યા
“ચા” પીવાની ના કહો છો?, લો “ચા“ના ચસકારા વેચી નાખ્યા
દેવમ સંઘવી
