મીટ સૌની આમતેમ છે-દિલ બેકરાર છે,
જાણે અહી બધાને તારો ઇન્તેઝાર છે.
દુઃખમાં હો જે ખુવાર તો એની દવા સુરા,
એનો ઉપાય શું જે સુરામાં ખુવાર છે!
એનાથી તો સરસ તારી અવહેલના હતી,
આ તારી આંખોમાં જે ગલત આવકાર છે.
આ રીતથી બધાને સમેટી લીધા અમે,
તારા વિચારમાં જ બધાના વિચાર છે.
બંનેમાંથી જરા જરા કંઈ ચુંટણી કરો,
સુખ બેહિસાબ છે અને દુઃખ બેશુમાર છે.
એ પણ છે એક મજા અહીં ચારે તરફ ફરો,
અંદર છે આવકાર છતાં દ્વાર બંધ છે.
હું પણ કશું કરું નહીં, એ પણ ન કઈ કરે,
મારા જ જેવો આળસુ પરવરદિગાર છે.
આનંદ પણ મળે છે પરંતુ વ્યથાની સાથ,
કેવો વિચિત્ર, કેવો સરસ તારો પ્યાર છે.
ગઝલોમાંથી કસબ ગયો, કારીગરી ગઈ,
ઉર્મિપ્રધાન છું, બહુ સામા વિચાર છે.
મેં કેટલું પીધું છે તને શું કહું, ‘મરીઝ’,
હમણાં તો જે પીવું છું નશાનો ઉતાર છે.
મરીઝ
