વૃક્ષ જે લોકો જીવનમાં વાવે નહીં

વૃક્ષ જે લોકો જીવનમાં વાવે નહીં
એ વિકસવાની કલામાં ફાવે નહીં

રોટલીને શાક થાળીમાં હોય તો
આજના બાળકને એવું ભાવે નહી

શ્હેરનાં બાળક ભણે છે જે સ્કુલમાં
બેન્ચ ક્યાં જન્મી એ સમજાવે નહી

મોં ઉપર કહેવું ગમે છે એ કારણે
શબ્દ મારા કોઇ ગાળા ચાવે નહી

ભાગ મારો રોજ દાદા લઇ આવતા
આજ કોઇ ભાગ મારો લાવે નહી

કોઇની યાદોની આવે વણજાર રોજ
આંખ સામે આવી એ રોકાવે નહી

રોજ પંખી ડાળ પર બેસીને ઝૂલે
પાનખર એ ડાળ ઉપર આવે નહી

એ મહોતરમાંને કહી-કહી થાકી ગયો
સ્વપ્નમાં આવી મને તડપાવે નહી

– નરેશ કે.ડૉડીયા